Hələ ötən ilin sonundan Rusiya Federasiya Şurasının spikeri Valentina Matviyenkonun Ermənistana səfəri barədə danışılırdı və hətta təxmini tarix – fevral ayının sonu göstərilirdi. Lakin bir neçə gün öncə Ermənistan parlamentinin sədri Alen Simonyan səfərin 5-6 iyun tarixlərinə planlaşdırıldığını bildirdi.

Axar.az xəbər verir ki, “Hraparak” nəşri Matviyenkonun İrəvana səfərinin təxirə salınmasının Paşinyanla əlaqəli olduğunu yazıb.

“Biz Vətəndaş Müqaviləsindəki mənbələrimizdən səfərin təxirə salınmasının səbəbini öyrəndik. Yazmışdıq ki, son geosiyasi hadisələrdən sonra Nikol Paşinyan sanki “yolunu azmış övlad” kimi yenidən Rusiyanın qucağına atılmağa qərar verib və bütün dövlət qurumlarına Rusiya ilə üfüqi səviyyədə institusional əlaqələri bərpa etməyi, tədbir və görüşlərdə iştirak etməyi tapşırıb. Lakin Rusiyada, necə deyərlər, Nikolun göz yaşlarına inanmırlar və hər şeyi faktlar və sübutlarla yoxlamağa qərar veriblər.

Hətta Ermənistan hakimiyyətinə “Avroreferendum” layihəsinin ləğvi tələbi irəli sürülüb. İkinci oxunuşun təxirə salınması bununla əlaqələndirilir və istisna deyil ki, ümumiyyətlə, ləğv oluna bilər”, - deyə nəşr qeyd edir.

Qeyd edək ki, bundan öncə “Fakt” nəşri də Paşinyanın istəyi ilə AB-yə inteqrasiya prosesinin başlanmasını nəzərdə tutan qanun layihəsinin ikinci oxunuşa təqdim edilmədiyini bildirmişdi.