Rusiyanın razılaşacağı halda Ukraynanın qəbul etdiyi 30 günlük dərhal müvəqqəti atəşkəs heç bir halda münaqişənin dondurulması demək deyil.

Axar.az xəbər verir ki, bu sözləri Ciddə danışıqlarında iştirak edən Ukrayna XİN başçısı Andrey Sibiqa sosial şəbəkə hesabında bildirib.

"Bu müvəqqəti atəşkəs nə üçün vacibdir? Burada söhbət dondurulmuş münaqişədən getmir. Söhbət yalnız müharibəni ədalətli şəkildə bitirmək üçün yol axtarmağa çalışmaqdan gedir. Bu həm də sülhdə kimin həqiqətən maraqlı olduğunu nümayiş etdirən bir addımdır", - Sibiqa vurğulayıb.

O, həmçinin Ciddə danışıqlarının yekunu ilə bağlı ABŞ-Ukrayna birgə bəyanatında ABŞ-ın kəşfiyyat məlumatlarının ötürülməsi və hərbi yardımın bərpasının xüsusi qeyd edilməsinə diqqət çəkib:

“Bundan başqa, bəyanat mineral ehtiyatlar üzrə sazişin imzalanması ilə bağlı birbaşa Ukrayna və ABŞ liderlərindən müsbət siqnalları əks etdirir. Üstəlik, bəyanata əsasən, bu razılaşma Ukraynanın uzunmüddətli rifahını və təhlükəsizliyini birbaşa ABŞ-ın təmin etməsi ilə əlaqələndirilir. Ukrayna tərəfi elə məhz buna çalışırdı”.

Qeyd edək ki, Ciddədə (Səudiyyə Ərəbistanı) ABŞ-Ukrayna danışıqları 11 martda baş tutub və tərəflər birgə bəyanat qəbul ediblər. Danışıqlar məhsuldar keçdiyi üçün 12 martda müzakirələrin davam etdirilməsinə ehtiyac qalmayıb.