Avropa ölkələri Rusiyaya müqavimət göstərə bilməz və ABŞ-ın dəstəyi olmadan müdafiə potensialını artırmaq planlarını həyata keçirə bilməyəcəklər.

Axar.az xəbər verir ki, bu barədə “Voll Strit Jurnal” məlumat yayıb.

Məlumata görə, Avropa ölkələrinin ordusunda strateji aviasiya, hava hücumundan müdafiə sistemləri, kəşfiyyat və qoşunların idarə edilməsi imkanları çatışmır:

“Böyük ölçüdə bu funksiyaları ABŞ yerinə yetirir ki, bu da Avropanın təhlükəsizliyini tamamilə Amerika resurslarından asılı edir. Avropanın hərbi sənayesi silah istehsalını artırmaqda çətinliklərlə üzləşir. Ukraynaya xeyli miqdarda avadanlıq ötürülüb, lakin onların əvəzləşdirilməsinin sürəti yetərli deyil. NATO Baş katibi Mark Rutte də qeyd etmişdi ki, Avropanın müdafiə sənayesi çox kiçik, parçalanmış və yavaşdır”.

Nəşr vurğulayır ki, NATO-nun Ukrayna ilə sərhəddə genişmiqyaslı təlimlər keçirməsinə və Avropa ölkələrinin hərbi xərclərini tədricən artırmasına baxmayaraq, ABŞ-ın dəstəyi olmadan alyansın müdafiə məqsədlərinə çatması çətin olacaq:

“Fevralda 10 minə yaxın NATO əsgəri Ukrayna ilə sərhəd yaxınlığında təlimlərdə iştirak edib, lakin ABŞ öz qüvvələrini onlara qoşmayıb. Bu baxımdan Avropa ölkələri "ABŞ-ın iştirakı olmadan öz təhlükəsizliklərini təmin edə biliblərmi" sualını ciddi düşünməyə başladı. Amma hələlik Avropa orduları ABŞ texnologiyası və liderliyindən asılı olaraq qalır”.