İran xarici işlər naziri Abbas Arakçı martın 16-da bir neçə saatlığına Omana səfər edib və bu ölkənin xarici işlər naziri Bədr əl-Busəidi ilə görüşüb.

Axar.az xəbər verir ki, Arakçı bu barədə özünün X hesabında yazıb.

“Ciddədə keçirilən son görüşdə Omanın xarici işlər naziri ilə əldə olunmuş razılığa əsasən, bu gün ümumi maraq və ya narahatlıq doğuran ikitərəfli və regional məsələləri nəzərdən keçirmək üçün Maskata qısa səfər etdim”, - o bildirib.

Bəzi qeyri-rəsmi mənbələr isə Arakçının ABŞ Prezidenti Donald Trampın Əli Xameneiyə yazdığı məktubuna cavabı çatdırmaq üçün Maskata getdiyini yazıb.

SEPAH-ın keçmiş baş komandanı Möhsün Rzayiyə bağlı “Tabnak” saytı da Arakçının Omana Trampın məktubuna Tehranın cavabını apardığının ehtimal edildiyini bildirib.