Moskva Moldovanın Rusiyadakı səfiri Lilian Dariyə Kişinyovda Rusiya diplomatik missiyasının bloklanması ilə bağlı qəti etirazını bildirib.

Axar.az xəbər verir ki, bu barədə Rusiya Xarici İşlər Nazirliyinin bəyanatında bildirilib.

“Belə ki, Moldova güc strukturlarının nümayəndələri guya Rusiya səfirliyinin minalanması ilə bağlı aldıqları məlumatlara istinad edərək bir neçə saat ərzində Rusiya diplomatik nümayəndəliyinin ərazisini tamamilə mühasirəyə alıblar”, - məlumatda vurğulanıb.

Qeyd edilib ki, Moldova tərəfi Vyana Konvensiyasının 1961-ci il Diplomatik Münasibətlər haqqında müddəaları və öhdəliklərini pozub:

“Bu insidentlə əlaqədar olaraq, Rusiya Xarici İşlər Nazirliyi Moldovanın Moskvadakı səfiri Dariyə qəti etirazını bildirib və Kişinyovda Rusiya diplomatik missiyasının təxribatçı blokadasının tez bir zamanda aradan qaldırılmasını tələb edib. Bir müddət sonra vəziyyət həll olunub və səfirliyin ətrafındakı mühasirə qaldırılıb”.