Ruslar işğal altında olan Zaporojye AES-də dizel yanacağı rezervuarını zədələyiblər.

Axar.az xəbər verir ki, bu barədə Ukraynanın Xarici İşlər Nazirliyinin sözçüsü Georgi Tixi X hesabında məlumat verib.

"Bizə Rusiyanın işğalı altındakı Zaporojye AES-də dizel yanacağı rezervuarının zədələnməsi ilə bağlı məlumat daxil olub. Sızan yanacaq stansiyanın fövqəladə generatorlarını 25 gün ərzində işlətmək üçün kifayət edərdi", – deyə Tixi bildirib.

Onun sözlərinə görə, bu insident Rusiyanın Ukraynanın lisenziyalı ekspertlərini qeyri-ixtisaslı müvəqqəti rusiyalı işçilərlə əvəz etməsinin birbaşa nəticəsidir:

"Ruslar stansiyanı təkcə işğal etməyiblər, həm də onun elementar təhlükəsizliyini təmin edə bilmirlər".

Tixi qeyd edib ki, Zaporojye AES-in Ukraynanın nəzarətinə qaytarılması vacibdir, çünki bu, gələcək insidentlərin qarşısını almağın yeganə yoludur.