ABŞ Prezidenti Donald Trampın bir sıra ölkəyə idxal rüsumları elan etməsindən sonra dünyanın ən zəngin insanları bir gündə 208 milyard dollar itirib.

Axar.az xəbər verir ki, bu barədə “Blumberq” məlumat yayıb.

“Prezident Donald Trampın elan etdiyi tariflər qlobal bazarları kəskin şəkildə aşağı salması ilə yanaşı, dünyanın ən zəngin 500 adamının 208 milyard dollar itirməsinə səbəb olub. Ümumi sərvətin azalması Blumberq Milyarderlər İndeksinin 13 illik tarixində dördüncü ən böyük azalmadır və COVİD-19 pandemiyasından bəri ən böyük enişdir. "Meta"nın təsisçisi Mark Zukerberq "Meta" səhmlərinin 8,96% ucuzlaşmasından sonra 17,9 milyard dollar və ya sərvətinin təxminən 9%-ni itirib. "Amazon"un qurucusu Ceff Bezosun sərvəti bir gündə 15,9 milyard dollar azalıb. "Amazon" səhmləri cümə axşamı günü təxminən 9% ucuzlaşaraq 2022-ci ilin aprelindən bəri ən böyük enişə düşüb. İlon Mask da “Tesla”nın səhmlərinin 5,47% ucuzlaşması nəticəsində 11 milyard dollar itirib”, - məlumatda qeyd olunub.