Türkiyə Prezidentinin sözçüsü İbrahim Qalın Almaniya Bundestaqının erməni iddialarına dair qərarı haqqında bəyanat verib.

Axar.az xəbər verir ki, Prezident Rəcəb Tayyib Ərdoğanı Keniya səfərində müşayiət edən Qalın Bundestaqın "erməni soyqırımı"nı tanımasının heç bir hüquqi əsas olmadığını və tarixi həqiqətlərə zidd olduğunu bildirib.

Qalın qərarı "siyasi məsuliyyətsizlik nümunəsi" olaraq qiymətləndirib:

"Türkiyə baxımından bu qərarın heç bir hökmü və mənası yoxdur. Bu qərarı ən şiddətli şəkildə pisləyirik".

Ərdoğanın 1915-ci il hadisələri ilə bağlı arxiv sənədlərə əsaslanaraq və tarixi həqiqətlərin işıqlandırılması üçün 2005-ci ildə ortaq tarix komissiyası qurulmasını dəvət etdiyini xatırladan Qalın bu günə qədər nə Ermənistandan, nə də "soyqırım" tezisini müdafiə edənlərdən çağırışa müsbət cavab verildiyini qeyd edib.

Qeyd edək ki, bu gün Almaniya Bundestaqında qondarma "erməni soyqırımı" ilə bağlı qətnamə qəbul edilib.