Belarus sərhədində Rusiya qoşunlarının sayının artırılması ölkənin müdafiəsinin gücləndirilməsi ilə əlaqədar deyil.

Axar.az xəbər verir ki, bunu Ukrayna mətbuatına açıqlamasında rusiyalı hərbi ekspert Pavel Felgenhauer söyləyib. Onun sözlərinə görə, bu fəaliyyətin əsas məqsədi Belarus vasitəsilə ediləcək hücumdur:

"Bu, Krım ssenarisinin də Belarusda təkrarlanması deyil. Bu, tamam ayrı şeydir. O, Belarusdan keçilərək edilən hücum əməliyyatları üçün lazımdır. Bu, daha çox Qərb cəbhəsinin güclənməsi ilə əlaqədardır. Yəni Belarusdan keçərək Polşa və Litvaya ediləcək hücum üçün yaradılan imkandır. Ciddi konflikt zamanı Kalininqrada gedəcək dəhlizə ehtiyac yaranacaq. Bu isə oraya ən qısa yoldur. Yəni qoşunlar NATO ilə gərginlik olacağı təqdirdə yaxınlıqda saxlanılmalıdır. NATO ilə Rusiya arasında hərbi konfliktin olmayacağını heç kim deyə bilməz. Hər iki tərəf buna hazırlaşır".

Qeyd edək ki, Rusiya bu gün Bryansk vilayətinə ağır texnika yeridib. Bu vilayət Belarus və Ukrayna ilə sərhəddə yerləşir.