Çin illərlə Avropa üçün iqtisadi çağırış olub, lakin ABŞ Prezidenti Donald Tramp administrasiyasının Pekinə qarşı böyük rüsumlar tətbiq etməsi fonunda vəziyyət fəlakətli hala gələ bilər.

Axar.az xəbər verir ki, bu barədə “Nyu York Tayms” nəşri yazıb.

“Çin geniş çeşiddə və kifayət qədər ucuz məhsullar istehsal edir. Söhbət elektromobillər və məişət texnikasından tutmuş oyuncaqlar və polad sənayesinə qədər müxtəlif sahələrdən gedir. Bu məhsulların əksəriyyəti bugünlərə qədər Amerika bazarı üçün nəzərdə tutulurdu.

Bu vəziyyətdə Avropada narahatlıq artır ki, Çin məhsullarının axını bazarı dempinq edəcək və Fransa, Almaniya, İtaliya və Avropa Birliyinin digər ölkələrində yerli sənayeni zəiflədəcək”, - nəşr yazıb.

“Artıq uzun müddətdir ki, həddən artıq istehsal gücü problemi mövcuddur, lakin bu məsələ nəhayət Avropa paytaxtlarına da çatıb. Avropada ümumi bir tendensiya və bir hiss var: bu dövrlərdə Avropa özü üçün dayanmalı və özünü qorumalıdır,” – deyə Vaşinqtonda yerləşən Beynəlxalq Münasibətlər Şurasının elmi əməkdaşı Liana Fiks bildirib.

Qeyd olunur ki, hələ ötən il Almaniya Çin elektromobillərinə tətbiq olunacaq rüsumların artırılmasına qarşı çıxmışdı, çünki bu, Çinin alman avtomobil sənayesinə vergi artırmaqla cavab verəcəyindən ehtiyatlanırdı.

“Ən pis ssenari – yüksək ABŞ rüsumları fonunda Çinin Avropa bazarını bürüməsidir”, – deyə siyasi tədqiqatlarla məşğul olan “Rhodium Group” təşkilatının baş məsləhətçisi Noa Barkin vurğulayıb.

Onun fikrincə, belə bir gedişat Avropa sənayesi üçün ikili zərbə olacaq və Avropa məhz bundan qaçmaq istəyir.