Son vaxtlarda Yunanıstanın “Dəniz məkanının planlaşdırılması” çərçivəsində Aralıq dənizinin şərq hissəsi və Egey dənizində heç bir hüquqi əsası olmayan və beynəlxalq hüquqa zidd olan bəzi təşəbbüslərini diqqətlə izləyirik.

Axar.az xəbər verir ki, bu barədə Türkiyə Milli Müdafiə Nazirliyi məlumat yayıb.

“Türkiyə Silahlı Qüvvələri olaraq Egey və Aralıq dənizinin şərq hissəsində hüquq və mənafelərimizi qorumaqda tam qərarlıyıq. Yunanıstanın dəniz yurisdiksiyası əraziləri ilə bağlı belə birtərəfli planları beynəlxalq hüquqa ziddir. Türkiyə, bölgədə ədalətli və beynəlxalq qanunlara uyğun dəniz yurisdiksiyasının bölüşdürülməsinin yalnız qarşılıqlı dialoq və xoş niyyət çərçivəsində mümkün olduğunu bildirir. Yunanıstanın mövcud mübahisələrə məhəl qoymayan və Türkiyə tərəfinin hüquqlarını pozan birtərəfli hərəkətləri, iddiaları və bəyanatları qəbuledilməzdir. Bu bəyanatların ölkəmiz üçün heç bir hüquqi nəticəsi yoxdur. Bu kontekstdə regionda baş verən proseslər yaxından izlənilir və ehtiyac yaranarsa, dərhal lazımi tədbirlər görüləcək”.

Qeyd edək ki, bir müddət əvvəl Yunanıstan Baş Qərargah rəisi Dimitrios Hupis 5 dəqiqə ərzində Türkiyəyə müdaxilə etməyə hazır olduqlarını açıqlamışdı.