ABŞ Prezidenti Donald Trampın düşünülməmiş xarici siyasət strategiyası dünyanı yeni nüvə silahı yarışının astanasına gətirib. Bu isə onun sülhyaratma səyləri ilə birbaşa ziddiyyət təşkil edir və nüvə münaqişəsi riskini əhəmiyyətli dərəcədə artırır.

Axar.az xəbər verir ki, bu barədə "Faynənşl Tayms" qəzeti məlumat yayıb.

Qeyd olunub ki, Tramp çoxdan nüvə müharibəsi təhlükəsindən narahatdır və guya bunun qarşısını almağa çalışır:

"Ağ Evə qayıtdıqdan az sonra o, nüvə arsenallarının azaldılması ilə bağlı Rusiya və Çinlə danışıqlara başlamaq niyyətində olduğunu açıqlayıb. O, həmçinin Tehran rejiminin nüvə bombası əldə etməsinin qarşısını almaq üçün İranla yeni nüvə sazişi üzrə danışıqlar aparır. Ancaq Avropanı Amerikanın hərbi zəmanəti olmadan tərk etmək təhdidləri ilə, xüsusən də Vaşinqtonun Moskva ilə açıq-aşkar yaxınlaşması fonunda o, Avropa ölkələrini çoxdan “basdırılmış” nüvə silahı ideyası üzərində düşünməyə məcbur etdi".