Rusiya Prezidenti Vladimir Putin bildirib ki, o, son üç ildə daha çox Kremldə gecələməli olub.

Axar.az Teleqraf-a istinadən xəbər verir ki, Rusiya lideri bunu “Rusiya. Kreml. Putin. 25 il” sənədli filminə müsahibəsində bildirib.

Sənədli kadrlarda Putin və VGTRK-nın jurnalisti Pavel Zarubinin Kremldəki mənzilə birlikdə daxil olduqları görünür.

Jurnalist prezidentdən soruşur: “Deməli, siz tez-tez burada gecələyirsiniz?”

Putin suala cavab olaraq deyir: "Bəli. Son üç ildə əsasən burada gecələməli oluram".

Pəncərənin yanındakı ağ pianinonu göstərərək jurnalist prezidentdən ifa etməyə vaxtının olub-olmadığını soruşur.

“Çox nadir hallarda” - deyə, Rusiya lideri jurnalistə cavab verir.

Putin daha sonra Zarubinə kitabxananı, iki yataq otağını və “ev kilsəsini” göstərir.