Türkiyə Hərbi Dəniz Qüvvələrinin komandanı admiral Ərcümənt Tatlıoğlu ilk dəfə olaraq nüvə enerjisi ilə işləyən sualtı qayıq yaratmaq niyyətlərini rəsmən açıqlayıb.

Axar.az xəbər verir ki, bu barədə yerli media məlumat yayıb.

Tatlıoğlu vurğulayıb ki, 139 ildir müstəqil dizaynlı sualtı qayıq yaratmaq bizim milli arzumuz olub:

“MILDEN bitdikdən sonra biz nüvə sualtı qayıqlarına doğru yeni bir addım atacağıq”.

Bildirilib ki, Türkiyə dəniz sənayesi son zamanlar həm də xaricdən asılılığı mümkün qədər azaltmaq üçün inkişaf edib. Artıq əhəmiyyətli nəticələr əldə etmiş milli gəmiqayırma proqramları MILGEM (Milli Gəmi) və MILDEN (Milli Dənizaltı) nüvə sualtı qayığının layihələndirilməsi üçün ilkin şərtləri yaratmışdır.

Türkiyəli hərbi ekspert, müdafiə sənayesi üzrə analitik Devrim Yaylalın belə bir gücə malik sualtı qayığın olmasının Türkiyəni müstəqil olaraq nüvə sualtı qayıqlarını layihələndirən, istehsal və istismar edən ölkələr sırasına daxil edə biləcəyi qənaətindədir. Bu ölkələrə ABŞ, Rusiya, Çin, Fransa, Böyük Britaniya və Hindistan daxildir.