Çin lideri Si Szinpin Moskvaya dörd günlük səfər edəcək ki, Rusiya Prezidenti Vladimir Putinlə sıx əlaqələrini nümayiş etdirsin. Eyni zamanda, onun məqsədi ABŞ-ı qlobal arenada zəiflətməkdir.

Axar.az xəbər verir ki, bu barədə “Blumberq” agentliyi məlumat yayıb.

Qeyd olunur ki, səfər çərçivəsində Si Putinlə şəxsi danışıqlar aparacaq. Bu, ABŞ Prezidenti Donald Trampın Çinə misli görünməmiş dərəcədə yüksək tariflər tətbiq etməsindən sonra iki lider arasında ilk görüş olacaq.

Nəşrin yazdığına görə, Çin liderinin Qırmızı meydandakı paradda iştirak etməsi ABŞ və Rusiya arasında son vaxtlar baş verən münasibətlərin yaxşılaşmasının Pekinin Moskva ilə əlaqələrinə təsir etmədiyinə işarədir:

“Gündəmin əsas məsələsi odur ki, hansı imkanlar mövcuddur və Rusiya ilə Çin ABŞ hegemoniyasını aşmaq üçün Trampın prezidentliyinin bu dörd ilindən necə koordinasiyalı şəkildə istifadə edə bilər?”

Qeyd edilib ki, Putin və Si Trampa Amerikanın qlobal üstünlüyünü dağıtmaqda kömək etmək və çoxqütblü dünya nizamına nail olmaq istəyirlər.