Ukrayna və ABŞ yeni yaradılmış Bərpa İnvestisiya Fondundan gəlirlərin bölüşdürülməsi üçün dəqiq bir mexanizmə malikdir.

Axar.az xəbər verir ki, bunu Ukrayna baş nazirinin müavini, iqtisadiyyat naziri Yuliya Sviridenko deyib.

Onun sözlərinə görə, saziş imzalanarkən ABŞ və Ukrayna Fondun paylarını bərabər şəkildə bölüşəcəklər – yəni 50/50 nisbətində. Lakin sonradan əlavə vəsaitlər yatırmaq mümkün olacaq və bu məbləğ gəlirin bölüşdürülməsinə təsir edəcək:

“Gəlir bölgüsü yalnız 10 ildən sonra həyata keçiriləcək. Bu dövr ərzində isə investisiyalar yalnız Ukraynaya yönəldiləcək. O ki qaldı gəlirlərin bölüşdürülməsinə, təsəvvür edin ki, fond 10 il ərzində 2 milyard dollar mənfəət gətirir. Bu müddətdə ABŞ fonda əlavə olaraq 1 milyard dollar yardım ayırıb. Belə olan halda, əvvəlcə həmin əlavə vəsait, yəni 1 milyard dollar ABŞ-a qaytarılır, qalan mənfəət tərəflər arasında bərabər şəkildə bölüşdürülür”.

Qeyd edək ki, ABŞ-Ukrayna Bərpa İnvestisiya Fondu haqqında saziş 1 may tarixində imzalanıb. Sənəddə ölkənin bərpasına yönəldilmiş və qlobal investisiyaların cəlb olunacağı xüsusi fondun yaradılması nəzərdə tutulur.