“Moldovan” adlı millət yoxdur, bildiyiniz rumındılar, eyni dil, eyni din, eyni tarix; “Moldovan” vətəndaşlıq tanımıdır. Amma bu yanaşma ilə razı olmayan böyük bir əhali qrupu var, onlar rusdillidirlər (müxtəlif etnik kökənli - amma rusdilli), Rusiya ilə məsafəli, amma dost olmaq istəyirlər, müharibədən qorxurlar, çünki ölkənin “təhlükəsizlik çətiri” yoxdur.

Axar.az xəbər verir ki, bu sözləri hazırda Kişinyovda olan siyasətçi Natiq Cəfərli deyib.

O bildirib ki, ölkənin siyasi və iqtisadi elitasının ikili vətəndaşlığı var - moldovalıların bəlkə də 25-30%-nin həm də Rumıniya pasportu mövcuddur:

“Rumıniyanın böyük təsiri olsa da, Moldovaya təhlükəsizlik zəmanəti verə bilmir, ya da rəsmi Brüssel onlara bu icazəni vermir. Çünki tək NATO yox, həm də AB ölkəsidir, buna görə də milli maraqlarını mücərrəd Avropa maraqlarına qurban verməyə məcburdur.

Əslində ən asan yol Rumıniya və Moldovanın birləşməsidir, bu yolla Moldova da avtomatik NATO və AB üzvü ola bilər, amma bunu nə NATO, nə də AB istəyir.

Yerli iqtisadçıların fikrincə, AB heç vaxt buna imkan verməyəcək, çünki Moldovanın AB-yə yük olacağını düşünürlər. İki Almaniyanın birləşməsindən 35 il keçməsinə baxmayaraq, Şərqi Almaniyanın (ADR) hələ də tam inteqrasiya olmadığından, fərqli səs verdiklərindən, fərqli iqtisadi vəziyyətdə olduqlarından burda da danışırlar.

Hələ bir Kremlin yaratdığı və idarə etdiyi “Dnestryanı respublika” dərdi də var. Moskva hər yerdə separatizm toxumu əkib onun “meyvələrindən” bəslənir, post-sovet məkanını separatizmlə zəhərləyib.

Moldovanın işi ağırdır, AB və NATO-ya qəbul etmirlər, güvəndikləri Rumıniya təkbaşına “çətir” vermir, separatizm bəlası bitməyib, hələ bir Ukrayna müharibəsi rusdillilərin sayını da artırıb - bura köçən ukraynalılar rusdillidirlər.

Bütün bunlara baxıb bir daha Ordumuza, təbii müttəfiqlərimizə şükür və təşəkkür edirəm: Allaha min şükür ki, dövlət və xalq olaraq post-sovet məkanında separatizmi məhv edən, suverenliyimizi və ərazi bütövlüyümüzü tam bərpa edən ilk və tək ölkəyik!

NATO ölkəsi olmasına baxmayaraq, bizimlə birgə işlək və ciddi təhlükəsizlik çətiri yaradan qardaş Türkiyəyə də minnətdaram - bu mözuda da keçmiş SSRİ respublikarı arasında (Baltikyanı ölkələr xaric) bir ilkə imza atan tək ölkəyik”.