Ukrayna və Rusiya Prezident administrasiyalarının nümayəndələri Konstantin Yeliseyev və Vladislav Surkov Donetskdə seçkilərin keçirilməsi ilə bağlı demək olar ki, formal razılıq əldə ediblər.

Axar.az xəbər verir ki, bu sözləri Ukraynanın İstanbul və Edinburqdakı keçmiş konsulu Boqdan Yaremenko bildirib.

"Görünür, seçim haqqında söhbət gedir. Danışıqları aparanlar konsultasiya prosesinin iştirakçıları deyillər, prezidentlərin çox yaxın məsləhətçiləridirlər. Bu, artıq hansısa bir sazişin ortada olmasından xəbər verir. Konkret razılıqların əldə edilməsinə ümidləri artırır. Ehtimal edilir ki, Donetskdə seçkilərin keçirilməsi ilə bağlı danışıqlar aparılır və nəticələrini biz bilməyəcəyik, çünki bu iki məmur ictimai siyasət aparmır. Bizə seçkilərin keçirilməsini gözləmək qalır. Hesab edirəm ki, artıq formal da olsa, razılıq əldə edilib", - Yaremenko qeyd edib.