Rusiyanın Suriyada hərbi iştirakı bir az da uzanarsa, itkilərinin sayı üçrəqəmli olacaq.

Axar.az xəbər verir ki, bu haqda politoloq Elxan Şahinoğlu yazıb. Siyasi şərhçi Suriyadakı müharibənin sonunun görünmədiyini bildirib:

"Rusiya Suriyada quru əməliyyatlarında iştirak etmədiyini daima vurğulasa da, artıq Suriyada 10-cu hərbçisini itirdiyini etiraf edib. Suriyadakı müharibənin sonu görünmür, bu ölkə İraqdan da pis vəziyyətə düşüb. İraq heç olmazsa, 3 hissəyə (sünni, şiə və kürdlər) bölünüb. Üstəlik, İŞİD də öz "payını" qoparıb. Suriyada isə hər bölgə kiçik xanlığa çevrilib və bir-biri ilə savaşırlar, burada xarici oyunçuların da sayı-hesabı yoxdur. Belə vəziyyətdə Rusiya nə Suriyanın ərazi bütövlüyünü, nə də Əsədin qələbəsini təmin edə biləcək. Bu isə o deməkdir ki, Rusiyanın Suriyada hərbi iştirakı bir az da uzanarsa, itkilərinin sayı üçrəqəmli olacaq".