İstanbulda keçirilən danışıqların ikinci raundu zamanı Rusiya tərəfi Ukraynaya atəşkəsə doğru atılacaq addımlarla bağlı öz memorandumunu təqdim edib. Bu sənəddə çoxsaylı qeyri-real tələblər yer alıb ki, bu da ABŞ-ı qəzəbləndirib.

Axar.az xəbər verir ki, bu barədə “ABC Nyus” amerikalı rəsmilərə istinadən yazıb.

Amerikalı rəsmilər Rusiyanın bir çox bəndləri ABŞ üçün “arzuolunmaz” hesab edilən tələblərlə çıxış etməsindən məyus olduqlarını, lakin buna təəccüblənmədiklərini bildiriblər. Onlar hesab edirlər ki, Moskva bu yolla danışıqlar prosesini uzatmağa çalışır.

Rəsmilər qeyd ediblər ki, İstanbulda ikinci raund başlamazdan əvvəl artıq ABŞ Prezidenti Donald Trampın administrasiyasında sülhə nail olunmaması səbəbindən məyusluq artırdı. Onların sözlərinə görə, son günlərdə ABŞ lideri Moskvaya qarşı daha da uzaq münasibət sərgiləməyə başlayıb.

Nəşr xatırladır ki, bundan əvvəl Tramp artıq Rusiyaya qarşı yeni sanksiyalar tətbiq etməklə hədələyib. Buna baxmayaraq, hələlik ABŞ administrasiyasının bu hədələri yerinə yetirmək üçün hər hansı bir addım atdığına dair heç bir əlamət yoxdur.

Qeyd edək ki, iyunun 2-də İstanbulun Çırağan sarayında Ukrayna və Rusiya nümayəndə heyətləri arasında növbəti görüş keçirilib. Burada Rusiya nümayəndələri Ukraynaya sülh üçün iki mərhələləli memorandum təqdim ediblər.