İrana zərbələr İsrail dövlətinin və yəhudi xalqının tarixində həlledici andır.

Axar.az xəbər verir ki, bunu İsrailin müdafiə naziri İsrail Katz ölkəsinin İrana zərbə endirməsindən bir qədər əvvəl yüksək rütbəli hərbi rəsmilərin iştirakı ilə keçirilən forumda çıxış edərkən deyib.

“Vəzifəyə başladığım ilk gündən İranın nüvə proqramının qarşısının alınmasını əsas prioritet kimi müəyyən etdim”, – deyə Katz bildirib.

O, İranın İsraili məhv etmək ideyasına heç vaxt olmadığı qədər sadiq olduğunu vurğulayıb:

“Hazırda kritik bir mərhələdəyik – əgər bu fürsəti qaçırsaq, İranın nüvə silahı əldə etməsinin qarşısını almaq üçün əlimizdə heç bir imkan qalmayacaq”.

O vurğulayıb ki, İsrail ötən bir il yarım ərzində İranın bölgədəki nümayəndələrinə qarşı tədbirlər görsə də, indi birbaşa ilanın başı ilə – İranın özü ilə qarşı-qarşıyadır.

Qeyd edək ki, İsrail Hərbi Hava Qüvvələri bu gün səhər tezdən İranın nüvə və hərbi bazalarına zərbələr endirib. Zərbələr nəticəsində İranın Natanzdakı nüvə obyekti, Təbriz və digər şəhərlərdəki hərbi və raket bazaları vurulub, İran Silahlı Qüvvələrinin Baş Qərargah rəisi, general-leytenant Məhəmməd Bagiri, İslam İnqilabı Keşikçiləri Korpusunun komandiri Hüseyn Salami, SEPAH generalı Qulaməli Rəşid, nüvə alimləri Məhəmməd Mehdi Tehrançı və Firudin Abbasi öldürülüblər.