Əgər Britaniya Avropa Birliyindən çıxsa, funt "qara çərşənbə" dövründəkindən daha çox ucuzlaşacaq.

Axar.az xəbər verir ki, bu sözlər amerikalı milyarder Corc Sorosun "Qardian" qəzetindəki məqaləsində yer alıb. O bu devalvasiyanın daha güclü və dağıdıcı olacağını bildirib:

"Ucuzlaşma 15%-dən çox olacaq. Əgər Britaniya Avropa Birliyindən çıxmaq qərarı versə, funtun real dəyəri 1,46 dollar yox, 1,15 dollardan aşağı olacaq. Mən istərdim ki, insanlar səsvermədən öncə AB-dən ayrılmanın nəticələrinin nə olacağını bilsinlər. AB-dən ayrılmağa səs vermək bu həftənin "qara cümə" ilə başa çatacağı deməkdir. Bu isə sadə insanlara ciddi ziyan vuracaq".

Qeyd edək ki, "qara çərşənbə" 1992-ci ildə Böyük Britaniyada baş verib. Məhz bu tarixdə funt sterlinq gözlənilmədən sürətlə ucuzlaşıb. Sonradan bu maxinasiyanın Corc Sorosun fəaliyyəti ilə bağlı olduğu müəyyən edilib. Bəzi mənbələr Sorosun "qara çərşənbə"dən 1,5 milyard dollar gəlir əldə etdiyini bildiriblər.