Rusiya Cənubi Qafqazda raketdən müdafiə sistemləri yerləşdirməklə özünün Qara dənizdəki təsirini bərpa etməyə çalışır.

Axar.az xəbər verir ki, bunu Gürcüstan mətbuatına müsahibəsində hərbi ekspert İrakli Aladaşvili söyləyib. Onun sözlərinə görə, ruslar Qara dənizə nəzarəti ələ keçirsələr, Cənubi Qafqazı tam nəzarət altına alacaqlar:

"1992-1993-cü illərdə onlar raketdən müdafiə sistemlərini Abxaziyada yerləşdirdilər. Hədəf bizim aviasiya idi. 2000-ci ildə yerli hakimiyyətin etirazına baxmayaraq, sistemlər Abxaziyadan çıxarıldı. Əvəzində, 2008-ci ildə Moskva qondarma rejimin ərazisinə daha güclü raketdən müdafiə sistemləri göndərdi. Moskvanın əsas məqsədi Qara dənizdəki təsir zonasıdır. NATO-nun həyəcan təbilini indi çalması alyansın komandanlığının minusudur. Krım və Abxaziyadakı sistemlər Moskvanın əl-qolunu açır. Əgər onlar Qara dənizə nəzarəti ələ alsalar, bizim sahilyanı bölgələrimizi bağlayacaqlar. NATO buraya ordu göndərmək istəsə belə, Rusiya onları məhv edəcək".