İran Qətərdə yerləşən ABŞ hərbi bazasına raket zərbəsi endirdikdən sonra ərəb ölkələrinin etimadını yenidən qazanmalı olacaq.

Axar.az xəbər verir ki, bunu Birləşmiş Ərəb Əmirlikləri Prezidentinin diplomatik müşaviri Ənvər Qərqaş deyib.

Onun sözlərinə görə, Fars körfəzi ölkələri İsrailin İrana qarşı apardığı müharibəyə qarşı qətiyyətli və fəal mövqe tutublar, bütün beynəlxalq platformalarda gərginliyin azaldılmasına çalışıblar və ilk növbədə İranın nüvə məsələsi ilə bağlı siyasi həll yolunun tapılmasına çağırıblar.

“Buna baxmayaraq, İran qardaş ölkə Qətərin suverenliyini hədəf almağı seçdi və bu hücum bizi – hamımızı əhatə edir,” – deyə Qərqaş vurğulayıb.

Qeyd edək ki, İsraillə 12 günlük müharibə vaxtı İran ABŞ hücumlarına cavab olaraq bu ölkənin Qətərdəki bazasına raket zərbələri endirib.