Çin Rusiyanı döyüş əməliyyatları üçün lazım olan avadanlıq, materiallar və dronlarla təmin etməyə davam edir və bu tədarükləri artırır.

Axar.az xəbər verir ki, bunu Ukrayna Prezidentinin sanksiyalar məsələləri üzrə müşaviri və səlahiyyətli nümayəndəsi Vladislav Vlasük deyib.

O əlavə edib ki, kağız üzərində Rusiyada istehsal olunmuş kimi görünən komponentlər çox güman ki, əslində Çin istehsalıdır.

Vladislav Vlasük bildirib ki, Ukraynanın Çin tədarüklərinə təsir etmək imkanları yoxdur: “Vəziyyəti yalnız ABŞ dəyişə bilər”.

Çin banklarına qarşı sanksiyalar da Rusiyaya qarşı tətbiq olunan Qərb sanksiyalarını pozmaq məqsədilə aparılan hesablaşmaların qarşısını almaqda kömək edə bilər:

“Avropa Birliyinin 18-ci sanksiya paketində iki Çin bankına qarşı məhdudiyyətlər nəzərdə tutulub”.

Səlahiyyətli nümayəndə əlavə edib ki, Ukrayna yaxın zamanda “Şahid” PUA-larında detalları aşkarlanan Çin şirkətinə qarşı sanksiya tətbiq etmə imkanını da araşdırır.