Rusiya Ukraynanın Krım vilayətində kütləvi şəkildə pasport paylamağa hazırlaşır.

"Axar.az" Ukrayna mətbuatına istinadən xəbər verir ki, bu barədə yerli jurnalist Oleq Kryuçkov məlumat yayıb.

"Rusiya Dövlət Dumasının deputatları Simferopolda olublar. Onlara MDB məsələləri üzrə komitənin sədri Leonid Slutskiy rəhbərlik edir. Ruslar Krım deputatları ilə görüş keçiriblər",- deyə jurnalist bildirib.

Jurnalist deputatlar arasında nədən söhbət getdiyini də bildirib: "Rusiya prosedurun asanlaşması üçün pasportlar paylamağa başlayıb. Rusiya Yanukoviçlə müxalifət arasında əldə olunmuş razılaşmaya əməl olunmasını tələb edir. Ən başlıcası, Kreml krımlıların referendum qərarına və yaxud Krımın Rusiyaya birləşmək çağırışına çox tez baxa bilər".

Qeyd edək ki, 2000-ci ilin əvvəllərində Rusiya Abxaziya və Cənubi Osetiyada da kütləvi şəkildə pasportlar paylayırdı. Bu da Tiflislə Moskva arasında münaqişə zamanı, yəni 2008-ci ilin avqustunda Kremlin "rus vətəndaşlarını" qorumaq adı altında Gürcüstan ərazisinə soxulmasına bəhanə vermişdi.