Ağ Ev və ABŞ Senatının kəşfiyyat komitəsi dünyada "dinləmə qalmaqalı" yaradan açıqlamalarla gündəmdə olan və az öncə bağışlanması üçün Amerika hökumətinə müraciət göndərən Snoudeni əfv etməkdən imtina edib.

Senatın kəşfiyyat komitəsinin rəhbəri, Demokratlar Partiyasının təmsilçisi senator Diana Faynştayn bildirib ki, Snouden Senatın və yaxud Nümayəndələr Palatasının kəşfiyyat komitəsinə zəng edib əlində olan məlumatlar haqda danışa bilərdi. Ancaq o, bunun yerinə məlumatları mətbuata ötürməklə ölkəyə böyük zərbə endirib və buna görə cavab verməlidir.

Hazırda Snouden Rusiyada bir illik sığınacaq alıb. ABŞ-da isə dövlət sirrini KİV-ə açdığı üçün ona cinayət işi qaldırılıb.