Özbəkistanın Dövlət Təhlükəsizliyi Xidməti (DTX) “İslam Dövləti” beynəlxalq terror təşkilatının tərkibinə daxil olan “Vilayət Xorasan” qrupunun fəaliyyətini üzə çıxarıb.

Axar.az xəbər verir ki, bu barədə Özbəkistan DTX-nin mətbuat xidməti məlumat yayıb.

“Dövlət Təhlükəsizliyi Xidmətinin daxili işlər orqanları ilə birgə keçirdiyi əməliyyat tədbirləri zamanı Namanqan şəhərində “İslam Dövləti-Xorasan” beynəlxalq terror təşkilatının məxfi yuvası üzə çıxarılıb. Qrupun 16 üzvünə məxsus yaşayış evlərində axtarışlar aparılıb, 37 mobil rabitə vasitəsi, DVD disklər, 4 fleş disk, o cümlədən noutbuk və planşet götürülüb”, - məlumatda bildirilib.

Qeyd olunub ki, qrupun təşkilatçısı Teleqram messencerində ümumilikdə 120-dən çox iştirakçının daxil olduğu virtual kanallar və qruplar yaradıb. Orada ekstremist materiallar paylanılıb:

“Hazırda qrupun təşkilatçısı və 3 fəal üzvü barəsində cinayət işi açılıb, həbs-qətimkan tədbiri seçilib. Qrupun qalan üzvləri barəsində də istintaq hərəkətləri aparılır”.