Ermənistan hərbi hissəni icazəsiz tərk etdiyi üçün axtarışda olan keçmiş hərbçi Semyon Subbotini Rusiyaya ekstradisiya etməkdən imtina edib.

Axar.az xəbər verir ki, bu barədə “Novaya qazeta” məlumat yayıb.

Məlumata görə, Rusiyanın İvanovo vilayətindəki hərbi hissədə rabitəçi olan Subbotin 2024-cü ilin sentyabrında “Meşə ilə gedin” layihəsinin köməyi ilə Ermənistana gedib.

Ermənistanda qanunsuz miqrant yaşayan Subbotin barəsində Rusiyada cinayət işi qaldırılıb və haqqında axtarış elan edilib. Rusiyadan onun arxasınca gələnlərin olduğu barədə məlumat alan Subbotin erməni polisinə təslim olub və 3 gün müddətinə həbs edilib. Təcridxanaya gələn rusiyalı hərbçilərin onu aparmaq niyyətləri də boşa çıxıb. Hüquq müdafiəçiləri polis və prokurorluqla əlaqə saxlayıb, adam oğurluğu riskinin olduğunu bildiriblər. Həbs müddəti başa çatdıqdan sonra Subbotin sərbəst buraxılaraq polis bölməsinə aparılıb və orada vəkillə təmin olunub.

Keçmiş hərbçi hazırda azadlıqdadır.