Sum vilayətində Rusiya ordusunun ən azı 3 taboru mühasirəyə düşüb.

Axar.az xəbər verir ki, bu barədə Ukrayna Teleqram kanalları məlumat yayıb.

Bildirilib ki, 11-12 iyul tarixlərində Ukrayna ordusu qüvvələrini cəmləşdirərək Sum vilayətinin qərb hissəsindəki cinahlarında əks-hücumlara keçib. Ukrayna qoşunları ilk zərbə ilə rusların Konstantinovka və Kondratovka kəndləri arasındakı mövqelərini, ikinci zərbə ilə isə şərqdə Alekseyevka və Vladimirovka kəndləri arasındakı mövqelərini darmadağın edib.

Kondratovkanın şimalında Ukrayna ordusu elə ilk gündə 3,5-4 km məsafə qət edib.

Ruslar mühasirəyə alınmış Kondratovkadan, həm də Konstantinovkadan əks-hücuma keçsələr də, iyulun 15-də 155-ci dəniz piyadaları briqadasının bölmələri, Kondratovkadakı 30 və 40-cı motoatıcı alayları mühasirəyə düşüblər. Rusların mühasirəni yarmaq cəhdləri uğursuzluqla və böyük itkilərlə nəticələnib.

Rusiya ordusunun mühasirədə 700-dən çox hərbçisinin qaldığı bildirilib.

İyulun 23-də mühasirəyə alınanların müqaviməti sona çatıb. Rus hərbçilərinin əksəriyyəti ölüb, az bir qism isə əsir götürülüb.

Alekseyevka istiqamətində də rusların daha 4 taboru oxşar vəziyyətlə üzləşib.

Qeyd olunub ki, əgər Ukrayna Silahlı Qüvvələri Alekseyevkanın şimalındakı mövqelərini saxlaya bilsə və mühasirənin yarılmasına mane olsa, Rusiya ordusu növbəti həftə ərzində 1000-ə qədər canlı qüvvə itirəcək.