Artıq bir ildən çoxdur ki, Sabunçu rayon Böyükşor yaşayış massivində Olimpiya stadionunun tikintisi ilə bağlı qızğın işlər gedir. Bu məqsədlə ərazidə olan mindən çox fərdi yaşayış evi və obyekt sahiblərinə kompensasiya verilməklə sökülüb. Təkcə bir evdən başqa... İndi yolu Ziya Bünyadov prospektindən düşən hər kəs tozlu-torpaq içərisində, bomboş ərazidə qalan tənha evə diqqətlə baxır. Və bu zaman istər-istəməz belə bir sual yaranır: hər kəs getdiyi halda niyə bu evə toxunmayıblar?..

Yeni tikilən Olimpiya stadionunun yaxınlığındakı Böyükşor qəsəbəsi, 12A ünvanda yerləşən bu tənha evdə Hüseynovlar ailəsi yaşayır. Ailə söküləcək evin müqabilində onlara veriləcək kompensasiyanın az olmasını əsas gətirərək öz evlərini tərk etməkdən imtina edib. Ərazidə söküntü işlərini həyata keçirən "Azəryolservis"in əməkdaşları isə verilən kompensasiyanın yetərli olduğunu iddia edir...

Məsələ ilə bağlı adıçəkilən ünvana baş çəkib "Olimp dağının ətəyində" qərarlaşan tənha evin sahibi ilə görüşdük. Bir stəkan çay içməklə onların problemlərini dinlədik.

Ev sahibi Ələkbər Hüseynov bizimlə söhbətində 1971-ci ildən burada yaşadığını və bu evin ona atasından miras qaldığını deyir:

"Gözümü bu evdə açmışam. Elə bu evdən də bağçaya, məktəbə və daha sonra isə əsgərliyə getmişəm. Bir sözlə, bütün həyatım bu evlə bağlı olub. Evin iki otağında qardaşım qalır. O, ailəli deyil. Üç otaqda iki övladım və həyat yoldaşımla biz yaşayırıq".

Ələkbər Hüseynovun sözlərinə görə, burdan köçmək istəməmələrinin səbəbi də evin kvadratmetrinin düzgün hesablanmaması və yaşayış sahəsinə görə onlara verilən kompensasiyanın az olması ilə bağlıdır:

"Evi divardan-divara deyil, sadəcə otaqların içindən ölçdülər. Divarların eni isə bir metrdir. Bunu da ümumi ölçüyə salmırlar. Evimiz 130 kvadratmetr olduğu halda 48 kvadratmetr ölçüblər. İcra nümayəndəliyindən və söküntü işlərini həyata keçirən "Azəryolservis"in əməkdaşları tərəfindən evimiz əsassız olaraq 48 kvadratmetr hesablandıqdan sonra bank hesabımıza cəmi 63 min 534 manat pul köçürülüb.

Bu məbləğə iki ailə üçün ev almaq olmaz. Mətbəxi saymırlar. Guya, mətbəxə pul verə bilmədiklərini dedilər. Sonda dedilər ki, 63 min 534 manat sizin hesabınızdadır, gedin bankdan götürün. Etirazımıza baxmayaraq, bizi eşitmədilər. Mən dəfələrlə "Azəryolservis"in əməkdaşlarına dedim ki, bu pula 2 ailə üçün biz necə ev alaq? Deyirlər, o bizim problemimiz deyil".

Ə.Hüseynovun sözlərinə görə, adıçəkilən yaşayış massivində 1700-dən çox ev olub. Ancaq onlardan az bir hissəsi qanuni tikili olub. Evlərin böyük əksəriyyəti sonradan tikildiyi üçün onların heç birinin sənədi olmayıb:
"Sənədləri qaydasında olmayan evlərin sahiblərinə dedilər ki, əslində sizə pul düşmür, ancaq gəlin, hər kvadratmetrə görə verilən 1020 manatla razılaşıb çıxın, əks halda heç bir kompensasiya ödənilməyəcək. Vaxtilə qeyri-qanuni tikilmiş evlərin sahibləri gördülər ki, onlara verilən pul qanuni tikilən evlərə verilən pulla eynidir. Ona görə də həmin evin sahibləri razılaşıb çıxdılar. Biz isə razılaşmadığımız üçün bu ağır şəraitdə yaşamağa məhkum olmuşuq".

Ev sahibinin sözlərinə görə, ərazidə söküntü aparan şirkətin nümayəndələri onları güdürlər ki, ailə evdən çıxıb harasa gedən kimi tikilini dağıtsınlar. Ona görə də bunu bilən Hüseynovlar ailəsi evi bir dəqiqə də olsun sahibsiz qoymurlar. Elə buna görə də 9 aydır işləmədiyini deyən Ələkbər Hüseynov hazırda maddi durumlarının da yaxşı olmadığını söylədi: "Əvvəllər fəhləliklə də olsa, ailəmi dolandırırdım. İndi evin sökülmə təhlükəsinə görə 9 aydır heç yerdə işləmirəm. Maddi durumumuz olduqca ağırdır. Qohumların, yaxınlarımın verdiyi borc pul hesabına yaşayırıq. Belə ədalətsizlik, belə zülm olmaz axı. Qazsız, işıqsız, susuz toz-torpaq içərisində bu ağır şəraitdə yaşamaq olar? Səhərə qədər işləyən maşınların səsindən yatmaq da olmur. Məni nəzərə almırlar, heç olmasa bu iki məktəblini nəzərə alsınlar".

Ailə başçısının sözlərinə görə, 2013-cü ilin may ayında başlayan söküntü işlərindən sonra iyun ayından etibarən evin qazı, işıq və su xətləri kəsilib. Axşamlar evi işıqlandırmaq üçün generatordan istifadə edən ailə suyu və qazı isə pulla almaq zorundadır:

"Artıq bir neçə aydır ki, bu şəraitdə yaşayırıq. Qaz, işıq və su xətləri kəsilib. Axşamlar evi işıqlandırmaq üçün generatordan istifadə edirəm. Yemək bişirmək, çay qaynatmaq üçün isə qaz balonundan istifadə edirik. Suyu da pulla alırıq. Mən dövlətdən artıq heç nə istəmirəm, öz halal haqqımı tələb edirəm. Məsələ ilə bağlı dəfələrlə Prezident Administrasiyasına müraciət etmişəm, ancaq baxan yoxdur. Mən mətbuat vasitəsi ilə ölkə başçısı cənab İlham Əliyevdən, birinci xanım Mehriban xanım Əliyevadan, səsimi eşidən hər kəsdən və ən əsası Allahımdan kömək istəyirəm. İnanıram ki, etdiyim müraciətlərin heç biri ölkə başçısına çatmır. Əgər mənim müraciətlərim prezidentimizə çatsaydı, indi mən burda, bu çətin şəraitdə yaşamağa məhkum olmazdım. Prezident dəfələrlə çıxışında deyib ki, evləri sökülən vətəndaşlar razı salınsın. Sökülən evlərin hər kvadratmetrinə 1500 manat ayrılması və sahəsi az olan evlərin sahiblərinə yaşayış vəziyyətləri nəzərə alınaraq Prezidentin Ehtiyat Fondundan 20 faiz əlavə yardımın verilməsi tapşırığını verib. Amma bütün bunlara baxmayaraq, problemimizi həll edən yoxdur. Prezident 1500 manat dediyi halda bunlar 1020 manat pul təklif edirlər. Bundan əlavə düzgün hesablama da aparılmır. Bayaq dediyim kimi, mənim evim 130 kvadratmetr olduğu halda cəmi 48 kvadratmetr hesablayırlar".

Ancaq bütün çətinliklərə baxmayaraq, aylardır ağır durumda yaşayan ailə bir gün haqq-ədalətin bərpa olunacağına, məsələnin ölkə başçısına çatdırılacağına, qanunla onlara düşən kompensasiyanı ala biləcəklərinə inanır:

"İnanıram ki, bir gün ədalət öz yerini tapacaq. Və mən inanıram ki, ölkə başçısı bu məsələdən xəbər tutan kimi bizə kömək edəcək. Ancaq zor gücünə heç kim məni öz evimdən, ata mülkümdən çıxara bilməz. Gəlib evi başımıza uçursalar da, haqqımızı almayana qədər heç yerə çıxan deyilik. Çox bezdirəcəklər, özümü yandıracam və buna görə də bizə zülm edən şəxslər ədalət məhkəməsi və Allah qarşısında cavab verməli olacaqlar..."