Kürün iki hissəyə ayırdığı Mingəçevirdə sakinlər təmiz suyun həsrətini çəkir. Şəhərin "Energetiklər" (Az DRES) qəsəbəsinin sakinləri Axar.az-a ünvanladıqları şikayətdə uzun illərdir bu problemdən əziyyət çəkdiklərini deyiblər:

"Mingəçevirdə yaşayanlar heç vaxt su qıtlığından əziyyət çəkməyiblər. Bir çox bölgələrindən fərqli olaraq, bizdə bütün günü mənzillərə təzyiqlə su gəlir. Ancaq bu suyun təmizlənməməsi bizim ömrümüzü azaldır. Kür suyu təmizlənmədən birbaşa kanaldan götürülərək evlərə verilir. Hansı ki, həmin çaya kanalizasiya suları da birbaşa axıdılır. Biz istifadəyə yaramayan suyu içmək məcburiyyətindəyik".

Sakinlər eyni zamanda uzun illərdir istifadə edilən su boruları və kanalizasiya xətlərinin sıradan çıxdığını bildiriblər. Bu səbəbdən də mənzillərə verilən suyun təzyiqi xeyli azalıb, qəzalar adət halı alıb.

Kanalın suyu birbaşa evlərə verilir

"Eko-TES" Ekoloji Tədqiqatlar və Maarifçilik İctimai Birliyinin sədri Çingiz Nəzərov da sakinlərin fikirlərini təsdiq edərək qəsəbəyə suyun Yuxarı Qarabağ kanalından götürülərək təmizlənmədən evlərə verildiyini deyib:

"Şəhərin mərkəzi hissəsinə verilən su Mingəçevir su anbarından 30-40 metr dərinlikdən götürülür və bütün təmizləmə proseslərindən keçərək sakinlərə paylanır. Bu sistem 1953-55-ci illərdə qurulub və hələ də istifadə edilir. Lakin "Enetgetiklər" qəsəbəsinə verilən su elə də dərin olmayan kanaldan götürülür və birbaşa sakinlərə ötürülür. Bu da onların səhhətində ciddi fəsadlara yol açır".

Çirkli su, köhnə borular...

İçməli suyun anbarlarda yığılmasını vacib sayan ekoloq burada suyun çökdüyünü və özü-özünü müəyyən qədər təmizlədiyini bildirib. Onun fikrincə, məişətdə istifadə üçün nəzərdə tutulan su dərinlikdən götürülməlidir:

"Eyni zamanda caya axıdılan tullantı sular da müəyyən təmizləmə mərhələsindən keçməlidir. Hazırda istifadə edilən borular da 30 ilə yaxındır quraşdırılıb. Təbii ki, onlar da korroziyaya uğrayıblar. Bütün bunlar sakinlərin içməli su problemini bir az da dərinləşdirib".

Ç.Nəzərov hazırda Mingəçevirdə su və kalaziyasiya xətlərinin yenilənməsi ilə bağlı işlər aparıldığını da qeyd edib.

Layihə hazırlandı, ancaq pul verən olmadı

Qeyd edək ki, 90-cı illərin əvvəllərində şəhərin su-kanalizasiya sisteminin yenidən qurulması üçün dəyəri 1 milyon manat olan layihə hazırlanıb. Onun yarı hissəsini "Azərenerji" ASC, qalanını isə Ekologiya və Təbii Sərvətlər Nazirliyi ödəməli idi. Lakin maliyyə ayrılmadığından layihə arxivə atılıb. Nəhayət, 2011-ci ilin oktyabrında "Mingəçevir şəhərinin su təchizatı və kanalizasiya sistemlərinin yenidən qurulması layihəsi"nə başlanııb.

"Sistem yenidən qurulur"

Problemə aydınlıq gətirən "Azərsu" ASC-nin mətbuat xidmətinin rəhbəri Anar Cəbrayıllı hazırda layihənin icrasının davam etdirilidiyini deyib:

"Mingəçevir su-kanalizasiya sistemi dövlət büdcəsi hesabına yenilənən 11 regiondan biridir. Burada sistemin yenilənməsi davam edir. Şəhərin su təchizatını tam təmin etmək üçün 3 yeni su anbarı qurulub. Əhalinin içməli su və kanalizasiya xidməti ilə tam təmin etmək üçün sistem yenidən qurulur".

Onu da deyək ki, adıçəkilən layihədə şəhərdə əhali artımının 2035-ci ilə qədər inkişafı nəzərə alınaraq məhsuldarlığı sutkada 20 min kubmetr olan ultrasüzgəcli təmizləyici qurğu, şəhərin özüaxımlı rejimdə su təchizatının aparılması üçün 15 min kubmetr həcmində su anbarı, ümumi uzunluğu 250 km olan müxtəlif diametrli paylayıcı su şəbəkəsinin inşası nəzərdə tutulub. Eyni zamanda çirkab suların toplanması üçün ümumi uzunluğu 223 km-ə qədər olan kanalizasiya şəbəkəsi, 3 ədəd kanalizasiya nasos stansiyasının tikintisi planlaşdırılıb.