Əhmədlidə, Sarayevo küçəsindəki diaqnostika mərkəzinin yaxınlığında bir təndirxana var: "Fatmeyi-Zəhra təndiri".

Burada təkcə çörək bişirilmir. Qapının ağzındakı tanıtım löhvəsində yazılıb: "peraşki, qril, qutab..."

İçəri keçirəm, iki qadın çörək bişirməklə məşğuldur. Qadınlardan biri – Cəmilə xanım "başıbağlıdır". O, iri bir teştin içində xəmir yoğurur və dodağının altında dua oxuyurmuş kimi yavaşcadan nə isə pıçıldayır. Fikir verirəm, səliqəlidir, işini də çox gözəl görür. Digər qadın isə Qax rayonundandır. "Başıbağlı" olmasa da, örpəklidir. Yaylığının altından yelçək bağlayıb ki, saçları qırılıb xəmirə qarışmasın. Adını soruşuram, demir. Onun işi hazır acıtmalı xəmiri kündələmək və kündəni təndirə yapmaqdır.

Bura gələn müştərilərin əksəriyyəti qadınlardır. Hiss olunur ki, daimi müştərilərdir, səmimi salamlaşır, hal-əhval tuturlar.

MÜŞTƏRİMİZ ÇOX OLSA MAAŞIMIZ ARTAR

Cəmiləni söhbətə çəkirəm, şəklini çəkirəm, işləri ilə maraqlanıram.

- Niyə axı bu təndirin adını belə qoymusuz, daha çox müştəri toplamaq üçün?

- Məşədixanım buranı icarəyə götürəndən sonra adını belə yazdırdı. Burda halal çörək bişir.

İşlərini tərifləyir. Dolanışıqdan gileylənir, amma şükür etməyi də unutmur:

- Buna da şükür, işləyirik. Ailəyə köməkdir, əgər müştərilərimizin sayı çox olsa, bir neçə kafe və toy evləri ilə əlaqəmiz olsa, daha çox çörək satarıq, maaşımız daha çox olar. Məhəbbət xanım başıbağlı olmasa da, dindar xanımdır. İndi burda yoxdur, rayona gedib, yoxsa o sizə daha çox məlumat verərdi.

NAXÇIVANDA YAŞAMAQ ÇƏTİNDİR

Maaşları ilə maraqlanıram, eləcə, "az da olsa, bərəkətlidir", - deyirlər.

Cəmilə xanım Şərurdan olduğunu deyir:

- Naxçıvanda yaşamaq çətindir. İş yeri yoxdur. Dolanışıq üçün hamı Türkiyəyə gedir. Mənim yoldaşım Bakıda işləyir, deyə biz burdayıq. Burda əlavə xərclər olmasa, maaşımız daha çox olar. Bütün təşkilatlar gəlir, gedir...

- Gəlib nə deyirlər ki..?

- Bizimlə danışmırlar. Məşədixanım yola salır onları. Sonra da deyir ki, bunlar olmasa maaşınızı artırardım.

ACIXƏMRƏ

- Yəqin, bura dindarlar gəlir, əsasən, hə?

- Kim gəlir, gəlsin, biz çörəyimizi təmiz bişiririk. Çəkisi 500 qram, qiyməti isə 40 qəpikdir. Xəmiri yoğurduqdan sonra acıdırıq. Özü də drojdan az istifadə edirik. Acıtmamız olur, ən azından dədə-baba yolu ilə, nənələrimizin bişirdiyi kimi bişiririk. Bəzən təndiri odunla qalayırıq. Onda çörək daha dadlı olur...

İşləriniz avand, təndiriniz isti olsun...