- Siz yeni ili harada qarşılayacaqsız?

- Küçədə, öz maşınımda.

Tiflisin mərkəzində müştəri gözləyən gürcü taksi sürücüsü belə deyir. Onun Yeni il axşamı ailəsi ilə birgə süfrə başında və ya restoranda olmaq imkanı yoxdur. Çünki şəhərdə minlərlə turist var və onlara xidmət etmək, həm də yaxşı qazanc götürmək lazımdır.

Axar.az-ın Yeni il günü Gürcüstan paytaxtında olan əməkdaşının sözlərinə görə, azərbaycanlılar Tiflisi sözün əsl mənasında "işğal" etmişdilər.

Şəhərin bütün hotelləri, restoranları azərbaycanlıların inhisarında idi. Tiflisdə hardasa, 5-6 min azərbaycanlı qonaq olardı. Əslində dekabrın 30-da xüsusi bir qatarın günorta saatlarında Bakıdan Tiflisə yola düşməsi ilə bu qənaətə gəlmək olardı ki, Gürcüstan azərbaycanlılar tərəfindən alınıb.

Yeni il axşamı Tiflisin mərkəzində çox az sayda gürcü bayramı qeyd edirdi.

Onların bir qrupu restoranlarda, müəyyən hissəsi Maydanda təşkil olunmuş konsert proqramında idi, qalanları isə evlərində bayramı qarşılayırdı. Şəhərdə əsasən azərbaycanlılar, qismən türkiyəlilər və amerikalı, avropalı turistlər gözə dəyirdi.

Gürcülər isə heç də bu fürsətdən sui-istifadə edərək hotel, restoran və taksilərdə qiymətləri süni şəkildə qaldırmamışdı. Ümumiyyətlə, bütün restoranlarda və hotellərdə yerlər əvvəlcədən sifariş olunmuşdu. Bunu sərhəd-keçid məntəqəsində yaranmış izdihamı görəndə də müəyyən etmək olardı.

Gürcülər Azərbaycandan gələn turist axınını məmnunluqla qarşıladılar və Yeni ili iş başında qulluq edərək keçirdilər...