...Arxadan boylanan İsveçrə üslubunda tikilmiş binalar parka ayrı panoram verir. Sanki Avropa şəhərindəsən, ya da kadrlarda tez-tez gördüyümüz Vaşinqtondakı xiyabanlardan birində. Açığı, indi Bakıda adamın daha çox sakitlik tapacağı, insan selindən uzaq bir yer varsa, o da Dədə Qorqud parkıdır.

Axar.az olaraq istirahət massivində müşahidələr aparıb, Dədə Qorqud parkından reportaj hazırlamışıq.

Parkda yaşıllıqlar seyrəkdir və həm qış, həm yay aylarında gəzinti üçün əlverişli deyil. Sərt külək soyuq havada gəzişməyə imkan vermir.

Təxminən, Qış parkı da eyni coğrafi şəraitə malikdir. Adam qış vaxtı bu parklarda yalnız dona bilər. Amma görünüşcə çox gözəl olan Dədə Qorqud parkında adamların azlığı, səs-küydən uzaq bir məkan olması gəzinti üçün ən yaxşı seçimdir.

Parkın başqa çatışmazlıqları da var. Məsələn, skamyaların azlığı, gəzməkdən yorulanda bir stəkan çay içmək üçün kafenin olmaması sakinləri narazı salır.

Və ən əsası, parkın içərisindəki göl böyük təhlükə mənbəyidir. Çünki ətrafı mühafizə olunmayıb, hər hansı məhdudlaşdırıcı sədd qoyulmayıb, yaxud nəzarətçilər ayrılmayıb.

Parkda qaçışan uşaqlar isə gölə tərəf yüyürürlər. Valideynin həssas şəkildə nəzarəti olmasa, azyaşlılar hər an yıxılıb suya düşə bilər. Yekunda istirahətə gələn insanların acı bir faciə ilə üzləşəcəyi istisna deyil.

Parkda olarkən bizimlə söhbətləşən sakinlər də o qənaətdədir ki, ilk növbədə gölün mühafizəsi təşkil olunsun.

Elə orda olarkən bir neçə dəfə bu təhlükənin şahidi olduq. Gölə tərəf qaçan uşaqlara valideynləri həyəcanlı şəkildə qışqırıb çağırış etməsələr, arzuolunmaz sonluq yaşana bilərdi.

Parka gələn sakinlərin digər təklifi isə ictimai nəqliyyatla əlaqədardır. Parkın "Gənclik" metro stansiyasına çıxışında heç bir avtobus dayanacağına rast gəlinmir.

Bu halda avtobuslar parkdan çıxıb marşrut gözləyən sərnişinlər üçün saxlamır. Belədə vətəndaş metroya qədər uzun bir yolu piyada qət etməyə məcbur qalır. Sakinlər təklif edirlər ki, avtobus dayanacağı qoyulsa, parka gələnlər üçün rahat olardı...