"Əgər bir insan irq saflığı
məfhumuna inanırsa, bir başqasının irqçiliyini rədd edə bilməz.
Əgər bir irqin ancaq və ancaq öz vətənində rahat yaşaya biləcəyini
düşünürsə, başqalarının da öz torpaqlarındakı "yad" irqləri
təmizləməsinə qarşı çıxa bilməz".
Lenni Brenner
"Skinhedlər, skinlər" ingilis dilindən tərcümədə (skinheads)
skin — dəri və baş mənalarını verir.
Skinhed neonasizm ideyasının tərəfdarı olan gənclərdən ibarət
submədəniyyətin toplum adıdır. Submədəniyyət elə yarandığı
müddətdən tamamilə apolitikdir. Burada nə solçu, nə də sağçı siyasi
baxışlar üstünlük təşkil edir.
Skinhedlərin xarici görünüşü modların geyim üslubunu
təkrarlayır: Fred Perri və Ben Şerman polo və sviterləri, Levis
cinsləri Krombi klassik paltosu və doktor Martens çəkmələri.
Əsas geyimə həmçinin dama-dama köynəklər, cins gödəkcələr və
nazik çiyinbağıları da daxildir.
Axar.az-ın əməkdaşı dünyanın müxtəlif ölkələrində yaşayan
skinhedlərlə söhbət edib.
Biatris Rinnə almandır, hazırda Almaniyada yaşayır. 30
yaşı var.
Biatris alman olsa da, Almaniyanın küçələrində rahat gəzə
bilmədiyini deyir:
"Bəzən işdən yorğun çıxıb Ştutqart küçələri ilə evə gedirsən.
Etmək istədiyin şey sadəcə dincəlməkdir. Amma hansısa kök
qadınlardan ibarət qaradərili kütlə yaxınlaşır və sədəqə
istəyir.
Xanımlar skinhed olduğumu görüb problem yaratmağa çalışır.
Əlbəttə ki, məsələ sonda polis müdaxiləsi ilə bölmədə bitir.
Cəriməni ödəyən tərəf isə quldur dəstəsi yox, mən oluram. Çünki
onlar xarici görünüşcə "normal vətəndaş"dır, mənsə skinhed".
Biatris küçədə skinhed dostları ilə gəzərkən bəyənmədikləri
irqlərə sataşmadıqlarını deyir:
"İzlədiyiniz ABŞ istehsalı filmlər özlərinə başqa mövzu tapa
bilmir. Çəkdikləri filmi həyəcanlı etmək üçün isə bizi dəli kimi
qələmə verirlər. Biz dəli deyilik. Kimdən istəyirsinizsə, soruşun,
problem yaradan tərəf həmişə qaralar (qaradərililər) olur".
Biatris skinhed olduğuna görə işdə heç bir problem yaşamadığını
deyir: "Skin partilərinə gedib işə vaxtında çata bilməsəm, iş
zamanı önümə çıxan qaradərilini alçaltsam, onda rəhbərliklə problem
yaşayaram. Mən ağıllı skinəm".
Kəren Lou Cənubi Avstraliyanın paytaxtı Adelaidada
yaşayır. 47 yaşlı nasist xanımın 25 yaşında oğlu var. Lakin o,
anasının ideyalarını "anlamır".
Kərenin babası İngiltərə Hərbi Hava Qüvvələrinin zabiti kimi
həlak olub. O, babasının qəhrəmancasına ölümü ilə fəxr etsə də,
onun yanlış amal uğrunda öldüyünü düşünür.
Kəren həyat tərzinin və ideyalarının siyasi olmadığını
düşünür:
"Mənim bu mövzuda çox şəxsi düşüncələrim var. Zənnimcə,
ideyalarım bir nəzəriyyə formasındadır. Mən və ailəm
müəyyənləşdirdiyimiz və düzgün hesab etdiyimiz yolla gedirik.
Avstraliya Veteranlarla Xidmətlər Liqasında müharibə veteranları
ilə çalışıram. Öz işimi çox sevirəm. Həyat tərzim, göründüyü kimi,
karyeramda mənə heç bir problem yaratmayıb. Həm də mən sakit insan
deyiləm, olduqca kobud və güclüyəm. Mənə problem yaratmaq asan iş
deyil".
Ceyk Dsva ABŞ skinhedidir. O, ölkəsində ağlardan daha
çox qaradərililərə hörmət bəsləndiyini deyir:
"Mənim tolerant, qonaqpərvər, liberal dövlətim var. Ölkədə hər
şey mükəmməldir. Tək çatışmazlıq ağların pozulan hüquqlarıdır".
Ceykin sözlərinə görə, ABŞ-da yaranan istənilən qarşıdurmada
ağdərililər "günahkar"dır, qaralar isə polislə əlbir olaraq, öz
xüsusi kartlarını (vətəndaşlıq sənədlərini) və ya öz pullarını
göstərərək asanlıqla məsuliyyətdən canlarını qurtara bilir:
"Küçə ilə gedərkən hansısa qaradərili sənə sataşırsa, qətiyyən
ona cavab verməməlisən. Çünki onlar bunu elə-belə deyil, planlı
edir".
Ceyk deyir ki, onun valideynləri skinhed yolunu tutduğuna görə
özlərini günahkar hiss edir:
"Bəzən anam deyir ki, mənə düzgün tərbiyə versəydi, mən skinhed
olmazdım. Bu mənə gülməli gəlir. Əgər onun valideynləri ona düzgün
tərbiyə versəydi, onda o da skinhed olardı".
Həmsöhbətlərimin şimal qonşumuz Rusiyada baş qaldıran neonasist,
skinhed cərəyanlarına münasibətlərini də bildirdilər.
Biatris xanım rus skinhedlərini də öz silahdaşı hesab etdiyini
dedi:
"Bu ideologiyaya sadiq olan hər kəs qardaşımız və bacımızdır,
ancaq öz ölkələrində".
47 yaşlı Kəren isə neonasionalizm ideyasına hörmət edən hər
kəslə yoldaşlığa hazır olduğunu bildirdi:
"Heç birimiz qanımızı, irqimizi və valideynlərimizi seçməmişik.
Rus qanı daşısa da, mənim ideyalarımı bölüşə və mənim
qəhrəmanlarıma itaət edə bilər. Bu onu alçaltmır. Belələrinə hörmət
edirəm, amma öz ölkələrində olduqları müddətcə".
Ceyk də bu mövzuda öz dostları ilə razılaşdı:
"Müharibə, məğlubiyyət və satqınlıq keçmişdə qaldı. Bütün bunlar
artıq tarixə qovuşub. Hazırda bzim kommunizmdən daha böyük
düşmənimiz var – İŞİD. Bu terror qruplaşmasına, qondarma islam
dövlətinə qarşı bütün ağdərilliər birləşib müharibə
aparmalıdır".