Hər kəs maska taxmalıdır. Artıq ölkədə kifayət qədər maska ehtiyatı var, lakin qıtlıq yaransa belə, insanlar ev şəraitində hazırlanmış maskalardan istifadə etməlidir.

Axar.az xəbər verir ki, bu barədə TƏBİB-in İdarə Heyətinin sədri Ramin Bayramlı Nazirlər Kabineti yanında Operativ Qərargahın bu gün keçirilən brifinqində çıxışı zamanı deyib.

R.Bayramlı parça maskalardan istifadə qaydalarına dair tələbləri də açıqlayıb:

- Sıx və bir neçə qat parçadan olmalı, üzdə rahat oturmalıdır;

- İplə başın arxasında bağlamaqla və ya rezin halqaları qulağın üstündən keçirməklə bərkitmək lazımdır;

- Rahat nəfəs almağa imkan verməlidir;

- Zədələnmədən və forması dəyişilmədən əllə və ya maşında yuyulub ütülənməlidir.

Parça maskadan istifadə zamanı istifadə ilə bağlı nələri bilməliyik:

- 2 metrlik sosial məsafəni təmin etməklə yanaşı, maskadan istifadə edilməlidir;

- Parça maskaların çıxarılması zamanı əl ilə gözə, buruna və ağıza toxunmamalı və maskanı çıxardıqdan dərhal sonra əllər sabunla yuyulmalıdır;

- Həkim və tibb işçilərinin N-95 və digər tibbi maskalara artan ehtiyacı nəzərə alaraq, digər insanlara parça maskalardan istifadəyə üstünlük verilməsi məsləhət görülür;

- Parça maskaları 6 yaşdan aşağı uşaqlar, nəfəs almaqda çətinlik çəkənlər, huşunu itirmiş, halsız və kömək olmadan maskanı çıxara bilməyən adamların taxmaları məsləhət deyil.