Avropa kinosunun görkəmli nümayəndələrindən olan polşalı rejissor Andcey Zulavski 75 yaşında vəfat edib.

Axar.az hollywoodreporter.com-a istinadən xəbər verir ki, Polşa Kinematoqrafçılar Birliyinin verdiyi məlumata görə, rejissor uzun müddət əziyyət çəkdiyi xərçəng xəstəliyi üzündən vəfat edib.

Qeyd edək ki, 1940-cı il noyabrın 22-də Polşada doğulan rejissor beş yaşında ailəsi ilə Fransaya köçüb. Fransada kino təhsili alan rejissor "Şeytan", "Ən vacib şey: Sevmək" kimi filmlərin rejissorudur. "Şeytan" filmi ölkəsi Polşada qadağan edilib. "Gümüş qlobus üzərində" adlı filminin çəkilişləri də ölkəsində qadağan ediləndən sonra filmini Fransada tamamlayıb. 15 il fasilə verən rejissor sonuncu - "Kosmos" filmini 2015-ci ildə çəkib.