2016-cı il martın 14-də Polşanın paytaxtı Varşava şəhərində "Salnamə" sənədli filmlər studiyasında dövlət sifarişi ilə çəkilmiş "Polkovnik" sənədli filminin nümayişi keçiriləcək.

Mədəniyyət və Turizm Nazirliyindən Axar.az-a verilən məlumatda bildirilir ki, film görkəmli hərbi xadim Vəli bəy Yadigarovdan bəhs edir.

V.Yadigarov rus çar ordusunun tərkibində I Dünya Müharibəsində iştirak edib, Azərbaycan Xalq Cümhuriyyəti Milli Ordusunda korpus komandirinin yanında eskadron komandiri olub. XI Qırmızı Ordu Bakıya daxil olanda III Şəki süvari alayının pərakəndə dəstəsi ilə vuruşa-vuruşa Gürcüstan ərzisinə çəkilib. 1921-ci ilin martınadək bolşeviklərə qarşı vuruşub və həmin il əvvəlcə Türkiyəyə, sonra Polşaya mühacirətə gedib. Polşada "Armiya krayova" xalq ordusunda əməliyyat şöbəsində süvari rəisi və 10-cu süvari atıcılar əlahiddə diviziyasının komandiri olub.

Filmin rejissorları Tahir Əliyev və Leji Lyubax (Polşa), ideya müəllifi Həsən Həsənov, ssenari müəllifi Ramil Ələkbərov, prodüseri Nazim Hüseynovdur.

Filmin çəkilişlərində polşalı kinematoqraflar da iştirak ediblər.