Bir həftə öncə İraq Prezidenti Bərham Saleh Türkiyəni ziyarət etdi, sayın Ərdoğanla görüşdü. Həmin görüşdə də eynui fikirlər səsləndirildi: Türkmanların hüquqları qorunmalıdır.

Bu sözləri İraq Türkman Cəbhəsinin lideri Ərşad Salehi Axar.az-a İraq Prezidenti Bərham Salehlə türkmanların təmsilçiləri arasında baş tutan görüş haqda danışarkən deyib.

Türkman lider prezidentin Türkiyə səfərindən bir gün sonra prezidentin müavini Fuad Oktayla görüşdüyünü açıqlayıb:

“Fuad Oktay da bizim ideya və tələblərimizi bu şəkildə dəstəklədi. Qayıtdıqdan sonra prezident türkmanları bizim rəhbərliyimizlə bir toplantıya çağırdı. Bu görüşdə Kərkük və digər problemli bölgələri müzakirə etdik. Eyni zamanda türkmanların hökumət içində yer alması da əsas müzakirə mövzularından oldu. Seçkilərdə niyə bu qədər problem yaşadığımızı soruşdu. Biz də ona türkmanların, özəlliklə İraq Türkman Cəbhəsi olaraq bizim yaşadığımız problemdən söz açdıq.

Prezidentliyə namizəd irəli sürülərkən parlamentdəki partiyalardan nümayəndə tələb olunduğu halda türkmanlardan heç bir partiyada təmsil olunmayan, siyasətdən uzaq birinin məqama gətirilməsi tələb olunur. Biz bunu qəbul etmərik. Biz İraq Türkman Cəbhəsinin nümayəndəsinin prezident müavinliyinə namizədliyini və bir türkman əsilli nazirin təyin olunmasını tələb etdik.

Prezident bu görüşlərə hörmət duyduğunu, partiyalar arasından seçib ona bir namizəd irəli sürməyimizi istədi və ona dəstək olacağını söylədi”.