19- 20 fevral tarixlərində BMT-nin Mərkəzi Asiya üzrə nümayəndəliyi və Özbəkistan Xarici İşlər Nazirliyi tərəfindən “Mərkəzi Asiyada asıllılıq: çağırışlar və yeni imkanlar” adlı beynəlxalq konfrans keçirilir.

Axar.az xəbər verir ki, Daşkənddə keçirilən foruma dünyanın 100-dən çox dövlətinin analitik mərkəzlərinin məşhur ekspertləri qatılıb. Ekspertlər regional əməkdaşlığın hazırkı vəziyyətini, təhlükəsizlik, ticarət, nəqliyyat, təhsil və elm kimi sahələrdəki məsələləri müzakirə edirlər. Eyni zamanda, konfransın işində Avropa Birliyi, Amerika Dövlətləri Təşkilatı, Arktika Konsultasiya Şurası, Dünya Bankı, Ümumdünya Ticarət Təşkilatı, Avropa İnvestisiya Bankı kimi regional və beynəlxalq institutlar da iştirak edir.

Azərbaycan heyətinə Milli Məclisin deputatı, Azərbaycan Respublikasının Prezidenti yanında Dövlət İdarəçilik Akademiyası nəzdində Siyasi tədqiqatlar mərkəzinin direktoru Elman Nəsirov, fəlsəfə doktoru, Baku Network Ekspert Şurasının rəhbəri Elxan Ələsgərov, Bakı Beynəlxalq Multikulturalizm Mərkəzinin məsləhətçisi, politoloq Tofiq Abbasov, Sputnik Azərbaycan mətbuat mərkəzinin başçısı, Cənubi Qafqaz Politoloqlar Klubunun rəhbəri İlqar Vəlizadə, Prezident yanında Dövlət İdarəçilik Akademiyasının müəllimi, Bakı Politoloqlar Klubunun rəhbəri Zaur Məmmədov iştirak edirlər. Azərbaycanlı ekspertlər öz çıxışlarında regiondakı proseslərə, Dağlıq Qarabağ münaqişəsinin bölgədəki əməkdaşlıq mühitinə vurduğu zərbəyə, Azərbaycanın beynəlxalq proseslərdə oynadığı rola aydınlıq gətirib.

Forumun yekunlarıyla bağlı yerli və xarici KİV nümayəndələri üçün brifinq təşkil olunacaq.