Ana səhifə Siyasət |
Paşinyanın danışıqların formatını dəyişdirməsinə dair təklifinin 3 əsas məqsədi var.
Bu sözləri Axar.az-a açıqlamasında QAFSAM-ın sədr müavini, siyasi elmlər üzrə fəlsəfə doktoru Nazim Cəfərsoy deyib.
“Birincisi, bununla daxili siyasətdə Qarabağ kartının özünə qarşı istifadə imkanını məhdudlaşdırmaq istəyir. İkincisi, beynəlxalq siyasətdə Ermənistanın Qarabağda baş verənlərə dair məsuliyyətini azaltmaq, hətta mümkünsə, bu məsuliyyətdən qaçmağa şalışır. Üçüncüsü və ən əsası müzakirələrdə Azərbaycana qarşı mövqeyini Qarabağ erməniləri üzərindən gücləndirmək niyyətindədir”, - ekspert bildirib.
Politoloq vurğulayıb ki, ancaq bu həmlə həm də Azərbaycana müzakirələr masasına daha iki güclü kart qoymaq imkanı verir:
“Birincisi, Azərbaycan da Ermənistandan qovulan azərbaycanlıların hüquqlarını müzakirə masasına gətirməlidir. Digər tərəfdən, müharibə Azərbaycan torpaqlarında fəsad yaradıb. Bunu nəzərdən qaçırmaq olmaz. Bu çərçivədə müharibənin verdiyi fəsadları Ermənistandan (və o masada tərəf kimi oturmağı çox istəyirlərsə, Qarabağ ermənilərindən) tələb etməliyik. Bu mövzu aktuallaşdırılmalıdır”.
Politoloq qeyd edib ki, mövcud reallıqlarda bu, mümkün görünməyə bilər:
“Ancaq format dəyişikliyi istəyən Ermənistan və Qarabağ ermənilərinə bunun nə mənaya gələcəyini anladıqları dildə başa salmaq lazımdır. Bu məsələləri danışıqlarda diplomatik bir həmlə kimi gündəmə gətirdiyimiz gün ermənilər format dəyişikliyi mövzusunu birdəfəlik bağlayacaq”.
Tarix
2019.03.16 / 16:26
|
Müəllif
Firuzə Vahidqızı
|