Ermənistan və Azərbaycan xarici işlər nazirlərinin gələcək görüşünün həmsədr ölkələrdən birində keçirilməsi imkanı müzakirə edilir.

Axar.az xəbər verir ki, bunu jurnalistlərə açıqlamasında Ermənistan Xarici İşlər Nazirliyinin mətbuat katibi Anna Naqdalyan deyib.

“Məsələ hələ də müzakirə mərhələsindədir. Birtərəfli anonslar və ictimai diskussiyalar praktikasından qaçmaq lazımdır. Görüşün vasitəçi ölkələrdən birinin ərazisində keçirilməsiylə bağlı vaxtından əvvəl verilən bəyanat proses iştirakçılarına münasibətdə, o cümlədən adı çəkilən həmsədrə qarşı hörmətsizlikdir”, - o bildirib.

Qeyd edək ki, bundan öncə Azərbaycan Xarici İşlər naziri Elmar Məmmədyarov Ermənistan-Azərbaycan XİN rəhbərlərinin növbəti görüşünün ABŞ-da Dövlət katibi Mayk Pompeonun vasitəçiliyi ilə keçirilə biləcəyini söyləyib.

Tərəflər arasında bundan öncəki görüş Rusiya XİN rəhbəri Sergey Lavrovun vasitəçiliyi ilə Moskvada baş tutub.