Ana səhifə Siyasət |
Azərbaycan Respublikasının Prezidenti yanında Dövlət İdarəçilik Akademiyasında (DİA) “Azərbaycan-Qazaxıstan əlaqələri və regional inteqrasiya” mövzusunda dəyirmi masa keçirilib.
Axar.az xəbər verir ki, Milli Məclis deputatlarının, ekspertlərin, professor və müəllim heyətinin iştirak etdiyi tədbirdə DİA-nın rektoru, akademik Urxan Ələkbərov Azərbaycan-Qazaxıstan əlaqələrinin inkişaf mərhələlərindən danışıb. O, iki dost və qardaş ölkə arasında əməkdaşlığın qurulmasında və inkişafında Azərbaycanın ümummilli lideri Heydər Əliyevin və Qazaxıstan lideri Nursultan Nazarbayevin müstəsna xidmətlərindən bəhs edib.
Akademik U.Ələkbərov bildirib ki, Heydər Əliyev dövründə başlamış siyasi kursun bugün Prezident İlham Əliyev tərəfindən uğurla davam etdirilməsi nəticəsində Azərbaycan-Qazaxıstan münasibətləri yeni keyfiyyət mərhələsinə qədəm qoyub.
Yeni Azərbaycan Partiyası beynəlxalq əlaqələr komissiyasının katibi, Milli Məclisin deputatı Elman Nəsirov və “Yeni Azərbaycan” qəzetinin baş redaktoru, deputat Hikmət Babaoğlu da iki ölkə arasındakı dostluq münasibətlərinin əhəmiyyətini diqqətə çatdırıblar.
Azərbaycan Mətbuat Şurasının sədri, Milli Məclisin deputatı Əflatun Amaşov, deputatlar Cavanşir Feyziyev, Aydın Hüseynov, Azər Badamov, və digərləri mövzu ilə bağlı fikirlərini bölüşüblər. Tədbir iştirakçıları 9 iyunda Qazaxıstanda keçiriləcək növbədənkənar prezident seçkisinin nəticələrinin ölkələrarası münasibətlərin növbəti dövrdə daha uğurlu mərhələyə keçməsinə rəvac verəcəyini söyləyiblər.
Çıxışçılar seçkidən sonrakı mərhələdə də qonşu və dost dövlətin prioritetlərinin və xarici siyasət kursunun dəyişməyəcəyinə ümid etdiklərini bildiriblər.
Tarix
2019.05.14 / 14:55
|
Müəllif
Büllurə Yunus
|