Uzun illər faşizm tərəfdarı Qaregin Njdenin (Ter-Arutyunyan) işini araşdıran rusiyalı tarixçi-qafqazşünas Oleq Kuznetsov Azərbaycan və Rusiyanın arxiv materialları əsasında Rusiya Federasiyasının Baş Prokurorluğuna nasizmin qəhrəmanlaşdırılması ilə bağlı rəsmi müraciət edib.

Axar.az xəbər verir ki, ərizədə Rusiyanın Krasnodar vilayətinin Armavir şəhərində yerləşən məbəddə millətçi Njdeyə xatirə lövhəsinin qoyulmasının nasizmin qəhrəmanlaşdırılması olduğu qeyd edilib.

Kuznetsov sözügedən qərarı asanlıqla qəbul etmədiyini söyləyib.

“Bu addımın şəxsən mənim və ölkəmdəki siyasi vəziyyət üçün hansı nəticələri ola biləcəyini gözəl anlayıram. Faktiki olaraq Rusiya hökumətini seçim qarşısında qoydum: erməni millətçiliyinin qəhrəmanlaşdırılmasını dəstəkləmək, ya da əksinə... Odur ki, Kremlin siyasi konyukturundan asılı olaraq, eyni dərəcədə həm qəhrəman, həm də ekstremist ola bilərəm”, - Kuznetsov bildirib.

Müraciət 16 iyulda təqdim edilib və qeydiyyatdan keçib.