Gürcüstanın ən varlı adamlarından biri, bazar dəyəri 1 milyard dollara yaxın olan TBC Bankın qurucusu və sahibi Mamuka Xazaradze siyasət aləminə girəcəyini, İvanişvilinin Gürcü Arzusu Partiyasına rəqib hərəkat yaradaraq, gələcək parlament seçkilərində iştirak edəcəyini bildirib.

Axar.az xəbər verir ki, bu sözləri politoloq Erkin Qədirli deyib. Politoloq bildirib ki, bu, iki baxımdan çox maraqlı xəbərdir:

“Birincisi, Gürcüstandakı demokratiya effektiv olaraq oliqarxiyaya çevrilir. Yəni dövlət vəzifələrindən qıraqda qazanılmış böyük pullar hesabına siyasətə girmək, hakimiyyətə gəlmək təcrübəsi dərinləşir və güclənir. İvanişvilinin Xazaradze ilə öz davası var və siyasətə girmək həvəsini oyadan da budur. Bu məsələlər Gürcüstanın iç problemidir.

İkincisi və bizim üçün daha maraqlısı - Xazaradze siyasətdə uğur qazana bilərsə, Azərbaycanda şəxsi və qanuni biznes maraqları olan ilk gürcü siyasətçisi olacaq. TBC-nin ölkəmizin maliyyə bazarında öz yeri var. Orası da maraqlıdır ki, bu bank İsraildə də bazara girə bilib. Azərbaycanla İsrailin maraq ortaqlığı baxımından Gürcüstanda belə bir siyasətçinin hakimiyyətə gəlməsi ölkəmizin yararına ola bilər”.