Ukraynada bugünkü təxribat atəşkəsin çox kövrək olduğunu bir daha sübut etdi.

Axar.az xəbər verir ki, bu sözləri politoloq Elxan Şahinoğlu bu gün səhər saatlarında Donbasdakı separatçıların Ukrayna ordusuna hücumunu şərh edərkən bildirib.

Politoloqun sözlərinə görə, Vladimir Zelenski müharibə istəmədiyini açıq şəkildə bəyan etmişdi və separatçılarla, o cümlədən Moskva ilə kiçik razılaşmalara da imza atmışdı:

“Vəziyyətin sabitləşməsinə inamın artdığı məqamda separatçılar Moskvanın təlimatıyla yenə təxribata əl atdılar. Luqansk separatçıları Minsk razılaşmalarını pozaraq, bu gün təmas xəttini yarıb hücuma keçməyə cəhd ediblər. Separatçılar Rusiyadan aldıqları bütün silah növlərindən Ukrayna ordusunun mövqelərinə zərbələr endirdilər. Ukrayna hərbçiləri arasında ölən və yaralananlar var. Ukrayna Prezidenti bu saatlarda Milli Təhlükəsizlik və Müdafiə Şurasının iclasını çağırıb. Zelenki nə qədər sülhpərvər olsa da, separatçıların təxribatını cavabsız qoymamağa çalışacaq”.

Politoloqun sözlərinə görə, bu olay Kremlin ətrafdakı münaqişələrin sülh yolu ilə həllinə maraqlı olmadığını göstəricisidir:

“Zelenski hökuməti son aylarda iqtisadiyyatda müəyyən irəriləyişlər əldə etməyə başlamışdı, maaşlar və pensiyalar artırdı. Aydındır ki, Ukraynanın sakit şəraitdə problemlərini həll etməyə çalışması və addım-addım irəliləməsi Kremlin maraqlarına uyğun deyil. Ona görə də növbəti təxribata ehtiyac var idi. Onu da etdilər. İndi Zelenski vaxtının çoxunu və ölkəsinin ehtiyaclarını yenidən separatçılarla mübarizəyə cəlb etməlidir. Kremlə də elə bu lazımdır”.

Qeyd edək ki, bu gün Donbasdakı separatçı rejim Ukrayna ordusunun Novotoşkovsk, Orexovo, Krımskoye, Xutor Volnıy yaşayış məntəqələrindəki mövqelərinə hücum edib.

Hücum nəticəsində Zoloto yaxınlığında Ukrayna ordusunun mövqelərini itirdiyi və itkilərin olduğu barədə məlumat yayılıb. İddiaya görə, hücumda rus muzdluları da iştirak edib.