Son bir neçə ay ərzində xüsusilə ASALA və PKK-nın sözdə təmsilçiləri Azərbaycanın işğal altındakı torpaqlarına gətirilib.

Axar.az xəbər verir ki, bunu Azərbaycanın Türkiyədəki səfiri Xəzər İbrahim Türkiyə mətbuatına açıqlamasında deyib.

“Ermənistanın hədəfi Azərbaycan ərazilərini işğal etməkdir. Buna baxmayaraq, bu gün Azərbaycan ordusu işğal altındakı 7 kəndi azad etdi. Ordumuz həm qurudan, həm də havadan ermənilərin təxribatlarına qarşılıq verir. Məsələdə Türkiyənin mövqeyi çox vacibdir. Türkiyə Azərbaycan üçün sadəcə qardaş dövlət deyil, eyni zamanda çox güclü ölkədir”, - səfir bildirib.

X.İbrahim qeyd edib ki, Ermənistan digər dövlətləri də bu işlərə qoşmağa çalışır:

“Azərbaycan buna cavab verə bilir. İndiki təxribat daha böyükdür. Bu hücumlar işğal altındakı rayonlardan gəlir. Hücumlar zamanı mülki əhali arasında şəhid olanlar da var. Buna görə də Azərbaycan Ordusu bütün cəbhə xətti boyunca Ermənistana qarşı əməliyyatlara başlayıb”.