Əgər verilişin aparıcısı və redaktorları ənənəvi kontingentdən əl çəkərək Şahnazarov kimi praqmatik düşüncəli, barışdırıcı mövqedən çıxış edən politoloqları dəvət etsələr, insanlığa, sülhə xidmət etmiş olarlar.

Axar.az xəbər verir ki, bunu millət vəkili Nəsib Məhəməliyev erməni əsilli rusiyalı kinorejissor Karen Şahnazarovun “Rossiya 1” kanalında çıxışları haqda danışarkən deyib.

O bildirib ki, Karen Şahnazarov Vladimir Solovyovun proqramında ermənilərdən daha artıq ermənipərəst iştirakçıların qarşısında reallığa söykənən həqiqətlə çıxış edib:

“Şahnazarov müharibənin başlanmasında və vəziyyətin bu səviyyəyə çatmasında Ermənistan rəhbərliyinin günahkar olduğunu bildirir. Azərbaycanın ərazi bütövlüyünün qəbul edilməsini və Prezident İlham Əliyevin müharibədən sonra ermənilərlə azərbaycanlıların birgə yaşaya biləcəkləri haqqında təkliflərinin doğru olduğunu qeyd edir.

Diqqət çəkən məqamlardan biri həmin tok-şounun daimi sakinlərinə çevrilən, erməni mafiyası tərəfindən satın alınmış iştirakçıların rejissorun fikirlərini təəccüblə qarşılamasıdır. Acınacaqlı görkəmləri onların sağlam düşüncəni qətiyyən qəbul etməyə hazır olmadıqlarını göstərir. Məhz qeyd etdiyim kontingentin sayəsində millətlər düşmənə çevrilib”.