Bunu anlamaq lazımdır: Dağlıq Qarabağ münaqişəsi məsələsində Azərbaycan düz, Ermənistan və ATƏT-in Minsk Qrupu isə səhv tərəfdir.

Axar.az xəbər verib ki, bu barədə Qazaxıstanın tanınmış ictimai-siyasi xadimi, diplomat, yazıçı, "dostluq" və "Şöhrət" ordenlərinin laureatı Oljas Süleymenov “Anastasiya Lavrina ilə xüsusi buraxılış” verilişində danışıb.

Onun sözlərinə görə, münaqişənin davam etdiyi 30 il ərzində Türkiyə Azərbaycana rəğbət bəsləyirdi. Bu gün də Türkiyə qardaş Azərbaycana son dərəcə mənəvi dəstək verir:

“Ankara Bakını dəstəkləyib və dəstəkləyəcək. Türkiyəni bunda heç kəs qınaya bilməz. Ermənilər Türkiyənin guya Azərbaycana hərbi dəstək verməsi, müsəlmanların xristianlara qarşı müharibə aparması haqqında danışırlar. Bu, cəfəngiyatdır. Burada söhbət yalnız Azərbaycanın işğal olunmuş torpaqlarından gedir”.

Süleymanovun fikrincə, bu gün Ermənistanın taleyini ölkənin ziyalıları həll etməlidir:

“Ziyalılardan başqa heç bir qüvvə – nə Ermənistan hökuməti, nə də hərbçilər bu ölkəyə kömək edə bilər”.

Tanınmış yazıçı, həmçinin bu gün böyük missiya yerinə yetirən Azərbaycan Ordusuna uğurlar arzulayıb.